سەرجەم بڵۆکەکان

بڵۆکی پەرەگراف یەکەم بڵۆکە کە دەیبینیت کاتێک پەڕه یان بابەتێک دروست دەکەیت. ئەم بڵۆکە ڕێگەت پێ دەدات ناوەڕۆکەکانت بنووسیت، هەروەها چەندین ڕێکخستن و هەڵبژاردەی لەگەڵدایە بۆ دەستکاریکردنی شێواز و دەرکەوتن.

بڵۆکی سەردێڕ ڕێگەت پێ دەدات بڕگەی نوێ بناسێنیت لە بابەتەکەت، هەروەها ناوەڕۆکەکەت ڕێکبخەیت. سەردێڕ یارمەتیی مرۆڤ و ئامێرەکان دەدات جوانتر و باشتر لە بابەتەکەت بگەن. سەردێڕەکان 6 ئاستیان هەیە. دەستکاریکەری بڵۆک بەشێوەیەکی بنەڕەت ناونیشانی پەڕە/بابەتەکە دەکات بە (H1) بۆیە تۆ لە (H2 – H6) بەکاردەهێنیت بۆ ڕێکخستنی بابەتەکەت.

دەتوانیت بەئاسانیی لەگەڵ‌ ئەم بڵۆکە لیستەکانت دروست بکەیت، ئەم بڵۆکە پشتگیریی لیستەی خاڵدار و ژمارەدار دەکات.

لە ڕێگەی بڵۆکی دەقەوە، پێداچوونەوەی کڕیاران، وتەی زانایان و ناوداران، سەرچاوەیەک لە پەڕتووکێکەوە، پیشان بدە. ئەم بڵۆکە بەشێوەیەکی جوان دەقەکانت بۆ دەخاتەڕوو، کە یارمەتیدەرێکی باشە بۆ جیاکردنەوەی دەقەکە لە تەواوی بابەتەکەت.

ئەم بڵۆکە دەستکاریکەی کلاسیکت بۆ دەکاتەوە، بەڵام لە شێوەی بڵۆک. ناتوانین پێشنیاری سوودی ئەم بڵۆکە بکەین، چونکە دەستکاریکەری بڵۆک بۆ دروستکردنی ئەزموونێکی نوێی نووسین و دیزاینە. گەڕانەوە بۆ دەستکاریکەری کلاسیک ئەزموونێکی باش نییە. بەڵام ئەم بڵۆکە سوودێکی زۆری هەیە بۆ ئەو کەسانەی ماڵپەڕەکانیان دەگوازنەوە لە ڕووکار و دەستکاریکەری کلاسیک بۆ بڵۆک. چونکە کاتێک بابەتەکانیان لە ماڵپەڕە کۆنەکەوە هاوردە دەکەن، وۆردپرێس ئەم بڵۆکەیان بۆ بەکاردەهێنێت تا بابەتەکانیان نەشێوێت. دواتر دەتوانن بیگۆڕن بە بڵۆکی پەرەگراف و سەردێڕ.

ئەم بڵۆکە ڕێگەت پێ دەدات کۆدەکان بنووسیت و پیشانیان بدەیت لە بابەتەکەت. زۆر بەسوودە بۆ کەسانێک کە بابەتی پرۆگرامسازی و گەشەپێدانی وێب دەنووسن.

بڵۆکی وردەکارییەکان پوختەیەک لە نووسین پیشان دەدات لەگەڵ‌تیرێک. کاتێک کرتەت لێ کرد، نووسینێک بە وردەکارییەوە دەردەکەوێت. ئەم بڵۆکە زۆر ناوازەیە بۆ دروستکردنی پەڕەی پرسیاری هەمیشە دووبارە (پهد). پرسیارێکی کورت دەنووسیت، پاشان وەڵامەکەی لە ژێرەوە. وەڵامەکە دەرناکەوێت تا سەردانکەران کرتە لە پرسیارەکە نەکەن.

ئەم بڵۆکە ڕێگەت پێ دەدات نووسینەکانت بەو شێوەیە دەربکەون کە نووسیوتە. ئەم بڵۆکە گونجاوە بۆ نووسینی ئینگلیزی و هەر زمانێکی چەپ بۆ ڕاست، هەروەها کۆد. دەتوانین بڵێین ئەم بڵۆکە تێکەڵەی بڵۆکەکانی پەرەگراف و کۆدە. هاوشێوەی پەرەگرافە چونکە دەتوانیت تێیدا بنووسیت، بەڵام هاوشێوەی پەرەگراف نییە، چونکە بۆشایی و ناوبڕی هێڵەکان وەکو خۆی پیشان دەدات. بۆ نموونە ئەگەر لە بڵۆکی پەرەگرافدا بنووسیت، کاتێک کلیلی دێڕگێڕت داگرت، بڵۆکێکی نوێی پەرەگراف دروست دەبێت. بەڵام لە بڵۆکی پێشوەختە فۆرماتکراو هێڵێکی نوێ دروست دەبێت، نەک بڵۆکێکی نوێ. هەروەها هاوشێوەی بڵۆکی کۆدە، چونکە بە جۆرەپیتی (monospace) پیشان دەدرێت و ناوازەیە بۆ لاگرتنی تەواو. بەڵام هاوشێوەی بڵۆکی کۆد نییە، چونکە ئەم ڕێگەت پێ دەدات دەستکاریی شێواز و دەرکەوتنی بڵۆکەکە بکەیت.

ئەگەر بتەوێت وتەی کەسێک بەجوانیی لە بابەت و پەڕەکەتدا پیشان بدەیت، بەڵام هەر لەگەڵ وتەکە ناوی کەسەکەش ئاماژە پێ بدەیت. ئەوە ئەم بڵۆکە باشترین هەڵبژاردەیە. ڕێگەت پێ دەدات وتەکان بە ناوی خاوەنەکانیانەوە بنووسیت و شێوازی جوانیان پێ بدەیت.

بۆ دروستکردنی خشتە لە بابەت و پەڕەکانت بەئاسانی.

ئەم بڵۆکە، ناوازەیە بۆ نووسینی هۆنراوە.

بڵۆکی وێنە ڕێگەت پێ دەدات وێنەکان تێکەڵکێشی ناوەڕۆکەکانت بکەیت، دەتوانیت بڵۆکەکە زیاد بکەیت و وێنەیەک لە ژێدەرگەی ڕەنگاڵەکەت بهێنیت. یان ڕاستەوخۆ وێنەیەک بار بکەیت.

بڵۆکی پێشانگا ڕێگەت پێ دەدات چەند وێنەیەک زیاد بکەیت و لە پێشانگایەکدا ڕێکیان بخەیت. دەتوانیت ژمارەی ستوونەکان و قەبارەی وێنەکان دیاریبکەیت.

بڵۆکی دەنگ ڕێگەت پێ دەدات مۆسیقا، گۆرانی، پۆدکاست و هتد زیاد بکەیت بۆ پەڕە\بابەتەکەت.

ئەم بڵۆکە ناوازەیە بۆ دیزاینکردنی ماڵپەڕەکەت. زۆرینەی کات لە دروستکردنی بەشی سەرەکیی ماڵپەڕەکاندا بەکاردەهێنرێت. چونکە ڕێگەت پێ دەدات وێنە یان ڤیدیۆیەک بکەیت بە پاشبنەما، هەروەها دەقێک یان چەند دەقێک لەسەریان بنووسیت. ئەم بڵۆکە لە ناو کلووی داواکاریشدا بەکاردێت.

ئەم بڵۆکە ڕێگەت پێ دەدات پەڕگەیەک لە ناو پەڕە\بابەتەکانت دابنێیت، تا ڕێگە بە خوێنەران و سەردانکەران بدەیت دایبگرن. بۆ نموونە، پەڕگەیەکی (PDF).

ئەم بڵۆکە ڕێگەت پێ دەدات وێنە\ڤیدیۆ و دەق لە تەنیشت یەک دابنێیت.

ئەم بڵۆکە ڕێگەت پێ دەدات ڤیدیۆ لەگەڵ ناوەڕۆکەکانت دابنێیت. ئەم بڵۆکە ئەو ڤیدیۆیانە پیشان دەدات کە بارت کردوون بۆ ژێدەرگەی ڕەنگاڵەی ماڵپەڕەکەت. واتە ڤیدیۆی ڕاژەی دەرەکی پیشان نادات.

ئەم بڵۆکە ڕێگەت پێ دەدات دوگمە یان چەند دووگمەیەک زیاد بکەیت بۆ پەڕە\بابەتەکانت.

ستوونەکان ڕێگەت پێ دەدات دەق، ڕەنگاڵە و جۆرەکانی تر ناوەڕۆک بخەیتە ناو ستوونەکان. دەتوانیت تا 6 دانە زیاد بکەیت. کاتێکیش قەبارەی پێویستی پەردە بەردەست نەبوو، بۆ نموونە لەسەر تەلەفوونەکان. ستوونی ژمارە یەک لە سەرەوە پیشان دەدرێت و کۆتا ستوونیش لە خوارەوە. لە ماڵپەڕێکی ڕاست بۆ چەپ، یەکەم ستوون لە ڕاستەوە یەکەم دانەیە.

ئەم بڵۆکە وەک کۆنتێنەر کار دەکات. دەتوانیت چەندین بڵۆکی بۆ زیاد بکەیت، پاشان دەستکاریی پانی، بەرزی و شوێنەکانیان بکەیت، هەموویان بەیەکەوە لە ناو کۆنتێنەرەکە. هەروەها تۆڕ ڕێگەت پێ دەدات بیگۆڕیت بە گرووپ، ڕیز و کۆمەڵ، بەبێ ئەوەی ناوەڕۆکەکانی ناوی بگۆڕدرێت.

یەکێکە لە بڵۆکە سەرەکییەکان بۆ دیزاین و دروستکردنی پەڕە و بابەتەکان. دەتوانێت هەرجۆرێک لە بڵۆکەکان بەیەکەوە بکەیت بە گرووپێک. ئەمە بۆ دوو شت سوودبەخشە، بۆ ڕێکخستن و دوورکەوتنەوە لە قەرەباڵغیی، هەروەها بۆ ئەوەی ئەو بڵۆکانەی کردووتە بە گرووپ بەیەکەوە دەستکاریی بکەیت، بۆ نموونە پێدانی ڕەنگی پاشبنەما، بۆشایی نێوانیان و هتد.

ڕیز هاوشێوەی گرووپ کار دەکات (گرووپ نییە)، بەکاردەهێنرێت بۆ ڕێکخستنی بڵۆکەکان بەشێوەی ئاسۆیی.

کۆمەڵ هاوشێوەی گرووپ کار دەکات (گرووپ نییە)، بەکاردەهێنرێت بۆ ڕێکخستنی بڵۆکەکان بەشێوەی ستوونی.

ئەم بڵۆکە بەستەری ‘زیاتر بخوێنەرەوە’ زیاد دەکات بابەتێک، پەڕەی بڵۆگ، یان ئەرشیفەکان.

بڵۆکی بەشکردنی پەڕە بەکاربهێنە، ئەگەر ویستت ناوەڕۆکەکانت بکەیت بە چەند پەڕەیەک. ئەمە بەسوودە ئەگەر ویستت فێرکارییەکی هەنگاو بە هەنگاو دروست بکەیت، یان پەڕە\بابەتەکانت بکەیت بە بەش بەش و ژمارەی پەڕەکانی پێ بدەیت.

بڵۆکی جیاکەرەوە هێڵێکی ئاسۆیی لە نێوان ناوەڕۆکەکانت دروست دەکات. دەتوانیت ناوەڕۆکی پەڕە و بابەتەکان بەشێوەیەکی دیارتر لە یەک جیا بکەیتەوە.

بڵۆکی بۆشایی بەکاربهێنە ئەگەر ویستت بۆشایی بخەیتە نێوان بڵۆکەکانت.

ئەم بڵۆکە بەکاربهێنە ئەگەر بتەوێت ئەرشیفی بابەتەکانت بە ڕێکەوت پیشان بدەیت. بۆ نموونە ئەگەر ساڵەکانی 2023، 2024، و 2025 بابەتت نووسیبێت. ئەم بڵۆکە ساڵەکان ڕیز دەکات. کاتێک کرتەت لە ساڵەکە کرد، سەرجەم بابەتەکانی ئەو ساڵەت پیشان دەدات.

ئەم بڵۆکە سەرجەم بابەتەکانت لە ناو ڕۆژەکانی مانگدا بۆ کۆدەکاتەوە. هەر کاتێک بابەتێک بڵاو بکەیتەوە، زیاد دەبێت بۆ ڕۆژەکانی ناو ئەم بڵۆکە. کاتێک کرتە لە ڕۆژێکی دیاریکراو دەکەیت، بابەتەکانی ئەو ڕۆژەت پیشان دەدات.

ئەم بڵۆکە سەرجەم زاراوەکانی پۆلێنکردنێک پیشان دەدات.

ئەم بڵۆکە سەرجەم هاوپۆلەکان پیشان دەدات. کاتێک کرتەت لە هاوپۆلێک کرد، دەتبات بۆ ئەرشیفی ئەو هاوپۆلە.

ئەم بڵۆکە ڕێگەت پێ دەدات کۆدی (HTML)ی دەستکردی خۆت زیاد بکەیت بۆ پەڕە و بابەتەکانت. کاتێک زیادت کرد، دەتوانیت کرتە لە پێشبینین بکەیت بۆ ئەوەی ئەنجامەکەی ببینیت. ئاگاداربە ئەم بڵۆکە تەنیا بۆ (HTML)ی خاوە، واتە کۆدی کورت لەم بڵۆکە دانانرێت.

ئەم بڵۆکە دوایین لێدوانەکان پیشان دەدات کە خوێنەران زیادیان کردووە لەسەر بابەت یان پەڕەیەک لە ماڵپەڕەکەت.

ئەم بڵۆکە دوایین بابەتە بڵاوکراوەکانت پیشان دەدات. چەندین هەڵبژاردە پێشکەش دەکات، تا بتوانیت چۆنێتیی دەرکەوتنی بابەتەکان دەستکاریی بکەیت. بۆ نموونە بابەتەکان بە شێوەی لیست دەربکەون یان خانە خانە، کورتەی بابەتەکە چەند نووسە بێت و هتد.

ئەم بڵۆکە سەرجەم پەڕە بڵاوکراوەکانت لە لیستەیەکدا پیشان دەدات. دەتوانیت لە ناو پەڕە، بابەت یان لاتەنیشتەکاندا بەکاری بهێنیت.

خۆراکی (RSS) وەشانی ناوەڕۆکی بڵۆگ یان وێبسایتێکە، کە تەنیا ئامێرەکان دەیخوێننەوە. لەگەڵ بڵۆکی (RSS) دەتوانیت ناوەڕۆکی هەر ماڵپەڕێک پیشان بدەیت کە دەتەوێت. هەروەها کۆمەڵێک دەسەڵاتت پێ دەدات، کە ئایا ناونیشان، نووسەر، ڕێکەوت، کورتەی بابەت پیشان بدەیت یان نا.

بڵۆکی گەڕان بەکاربهێنە تا خانە و دوگمەیەک زیاد بکەیت بۆ پەڕە یان بابەتەکانت. لەو ڕێگەیەوە خوێنەران بەدوای ئەو زاراوەیەدا دەگەڕێن کە دەیانەوێت. دەتوانیت بڵۆکی گەڕان لە هەر شوێنێک بەکاربهێنیت کە دەتەوێت. بەڵام گونجاوترین شوێنەکان، سەرپەڕە، ژێرپەڕە و پەڕەی 404ە.

کۆدی کورت یان کورتەکۆد جۆرە کۆدێکی تایبەت بە وۆردپرێسە. ڕێگەت پێ دەدات، کاری ئاڵۆز بەئاسانیی ئەنجام بدەیت. بۆ نموونە دەکرێت پێوەکراوێک دابمەزرێنیت، ئەم پێوەکراوە داشبۆردێک پێشکەش بکات، لەجیاتیی ئەوەی تەواوی کۆدەکانی داشبۆردەکە لە ناو پەڕەکە جێگیر بکرێت، کۆدێکی کورت دادەنرێت. ئەمەش داشبۆردە ئاڵۆزەکەت بەئاسانیی بۆ پیشان دەدات.

ئەم بڵۆکە ڕێگەت دەدات بەستەر هەژمارەکانت لە تۆڕە کۆمەڵایەتییەکان بە وێنۆچکەی تۆڕە کۆمەڵایەتییەکەوە دابنێیت. کاتێک خوێنەرانت کرتەیان لێ کرد، ڕەوانە دەکرێن بۆ هەژمارەکەت.

ئەم بڵۆکە سەرجەم هاوپۆل\تاگەکانی بڵۆگەکەت بە شێوەی ئاوبێیی زیاد دەکات. هاوپۆل\تاگەکانت بە قەبارەی جۆرەپیت ڕێکدەخرێن. ئەو هاوپۆل\تاگەی لە بڵۆگەکەت زۆر بەکارت هێنابێت. گەورەترین قەبارەی دەبێت. ئەمە هەم شێوەیەکی جوان دەبەخشێت بە پەڕە\بابەتەکانت، هەم خوێنەرانت دەزانن لەسەر چ جۆرە بابەتێک زۆرترین جار نووسیوتە.

بڵۆکی ڕێدۆزیی بەکاردەهێنرێت بۆ پیشاندانی لیستەی ڕێدۆزیی لە ماڵپەڕەکەت. هەر کاتێک سەردانی ماڵپەڕێک دەکەیت، لیستەیەک دەبینیت لە “سەرەتا، دەربارە، بڵۆگ، پەیوەندی” و هەتادوایی. ئەوە پێی دەوترێت لیستەی ڕێدۆزی. بەشێوەیەکی گشتی، بڵۆکی ڕێدۆزیی لە سەرپەڕە و ژێرپەڕەی ماڵپەڕەکەت دادەنرێت. بەڵام ئازادیت لە بەکارهێنانی لە هەر شوێنێکی تریش. ئەم بڵۆکە ڕێگەت پێ دەدات بەستەری دەستکرد و لیستەی لاوەکییش دروست بکەیت.

کاتێک ویستت نیشانەی پێناسی کارەکەت لە سەرپەڕە یان ژێرپەڕەی ماڵپەڕەکەت دابنێیت، ئەوە ئەم بڵۆکە ئەو کارەت بۆ دەکات. ڕێگەت پێ دەدات دەستکاریی قەبارەی نیشانەی پێناسەکە بکەیت. هەروەها بیکەیت بە بەستەرێک بۆ پەڕەی ماڵەوە یان نا.

ئەم بڵۆکە ڕێگەت پێ دەدات ناونیشانی ماڵپەڕەکەت لە سەرپەڕە یان ژێرپەڕەی ماڵپەڕەکەت پیشان بدەیت. بیکەیت بە بەستەرێک بۆ پەڕەی ماڵەوە. یان دەستکاریی ناونیشانی ماڵپەڕەکەت بکەیت. ئاگاداربە، هەر گۆڕانکارییەک بکەیت، لە تەواوی ماڵپەڕەکەت و تووڵی ناونیشانی وێبگەڕ جێگیر دەبێت.

ئەم بڵۆکە ڕێگەت پێ دەدات دروشمی ماڵپەڕەکەت پیشان بدەیت، یان دانەیەک دروست بکەیت. دروشمی ماڵپەڕ کورتە دەقێکە کە بە چەند وشەیەک ئامانجی ماڵپەڕەکە ڕوون دەکاتەوە. ئاگاداربە هەر گۆڕانکارییەک بکەیت لە تەواوی ماڵپەڕەکەت و تووڵی ناونیشانی وێبگەڕ جێگیر دەبێت.

---

بەستەری بابەتی داهاتوو پیشان دەدات. (ئەو بابەتەی دوای ئەوەیە کە ئێستا دەیخوێنیتەوە.)

بەستەری بابەتی پێشوو پیشان دەدات. (ئەو بابەتەی پێش ئەوەیە کە ئێستا دەیخوێنیتەوە.)

سەرنجەکانی بابەتەکە پیشان دەدات.

فۆرمی نووسینی سەرنجەکان پیشان دەدات.

بەستەرەکانی چوونەژوورەوە\چوونەدەرەوە بۆ ماڵپەڕەکە پیشان دەدات.

وەسفی هاوپۆل، تاگ، و پۆلێنە دەستکردەکان پیشان دەدات لە پەڕەی ئەرشیف.

ناونیشانی ئەرشیف بەپێی ئامانجی داواکراو پیشان بدە. بۆ نموونە ئەگەر لە داڕێژەی هاوپۆلەکان بەکاری بهێنیت. کاتێک پەڕەی ئەرشیفی ئەو هاوپۆلە دەکەیتەوە، ئەم بڵۆکە ناوی هاوپۆلەکە وەکو ناونیشانی پەڕەکە پوختە دەکات.

بەشێوەیەکی جوڵاو دەقێک و زاراوەکە پیشان دەدات کە گەڕانی بۆ کراوە. پێویستە ئەم بڵۆکە لە داڕێژەی ئەنجامەکانی گەڕان بەکاربهێنیت. بڵۆکەکە ئەمە پوختە دەکات. (ئەنجامەکانی گەڕان بۆ: “ئەو شتەی گەڕانی بۆ کراوە”).

بایۆی نووسەری بابەتەکە پیشان دەدات. دەبێت نووسەرەکە لە پرۆفایلەکەی خۆی بایۆی نووسیبێت.

سەرجەم بڵۆکەکانی ئەم بەشە یەک ئەرکیان هەیە. بۆیە باسکردنیان دانە دانە پێویست نییە. ئەرکەکەش بریتییە لە پیشاندانی ناوەڕۆکێکی دەرەکی، تەنیا بە ڕوونووسکردنی بەستەرەکانیان. بۆ نموونە بەستەری ڤیدیۆیەکی یوتیوب ڕوونووس بکە و لە ناو بڵۆکی تێخراوی یوتیوب دایبنێ. بڵۆکەکە ڤیدیۆکەت بۆ پیشان دەدات. هەمان شێوەیە بۆ سەرجەم ڕاژەکانی تر، لەوانە: وۆردپرێس، سپۆتیفای، پۆکێت کاستس، تەمبڵەر، بلوسکای و هتد. بە کۆی گشتی 31 بڵۆک بۆ پیشاندانی ناوەڕۆکە دەرەکییەکان بەردەستن.